Victor Biak Lian
October 28-November 28, 2009:

Tutan India kan tlawn cu ngeihchiatnak, lomhnak le thinhunnak, a phun phun aa phua. Thabat nih dangkhat a si hoi! Mitkuh vuailo hi cu chapchihmi ko a lo. Sihmanhsehlaw, Mizo nih an uar ngai mi Mizo bei (tihang thak nawn te) nih kan rawlei ka cu a kan thawtter ngai ngai. A khuacan ruang zong ah dik a si hnga!

Kakal lei ah Delhi ah ni 4 ka cam pah. Ruahlopi in Kum 22 tluk ka hmuh ti lo mi ka hawipa Evangelist Van Ram Uk Delhi a phan tiah an ka chimh tik ah a mah thawngthabia ngeih cu ka va i thawh ve. Minung 800 tluk cu kan si lai dah! Pulpit cung in a mah zong nih kahawidawt kum saupi i hmuti lo in kan um hnu ah Aa Vic he kan i hmu than i Pathian kathangthat a ti. Kei zong Pathian ka thangthat ve. Esther tuanbia he pehtlai in a kan cawnpiak mi cu ngeih a nuam hringhran. Pathian lamkaltu hrim hrim a si ka ti. Voi 2 hlengte kaa pum. Bia pakhat te a ka cah. Ni 3 rawl va ul law, kuak na fih lai. Zarhkhat na ulh khawh ah cun damlonak na ngeih mi vialte an lo lai i, ni 12 na ulh khawh ah cun na thau vialte a zor lai... a ti. Khuallam ah ka um lio a si ca ah, Inn kaphak tik ah ni 3 tel cu ka va i zuam ve hrim hrim ko lai tiah ka hei ti ve. Ni 40 pei rawl ka ulh cu tiah a ka chimh. ka pum ah damlonak vial te a chuak dih cang i ka dam tak tak a ti. Pathian nih damnak le thlarau thazang thawnak a chap chin chin lai.

Tutan ah thil khuaruahhar deuh ka ton mi cu: India Cozah lei in mihlathlaitu nih ka kalnak poh ah an ka zulh. Cu ca ah cun, an mah sin ah Pu Lian Hmung he kan leng hna i, kan riantuan mi vialte kan va chimh dih law law hna. An i nuam ngai ve. Mizo ah kaa ruah ca ah nan ram luhnak ca ah permit ka herhlo tiah pei ka ruah cu ka hei ti hna. A hnu ah bia vaivuan tam ngai an ka chimh mi cu: Nan kal nan um hi dah kaw, mihlathlaitu sin ah a va chimtawn tu an um cuh! ti a si. An ca ah phaisa hmuhnak a va si ah cun a that ko hen cu ka hei ti men!

Saiha, Lawngtlai, Lunglei tiang zankhat duahmah riak in kan va tlawng hna i, ka lung a leng ngai ngai. Kan Mautam rawlphawtnak kong deuh ah a si. Van a thiang, nikhua a that tik ah fing le tlang te te hna hi kan hna a kan ngamhtu kan thli thiang hna hi damnak a kan petu le kan ti thiang hna hi kan thisen a thawntertu an si ko ka hei ti. Kan ei le din hin cun damnak le thaunak cu an si lo pei tiah! Mautam a dih rih lo tiah chimh kan duh hna.

Khuallam in Aizawl ka rak phak tik ah cun Kawlram ka hei chonh hna i, kan nau nu (Chiah Kio, Chin State Sport Officer fanu Dawt Dawt) kum 23 nih Rgn ah a kan thihtak ti a si. Telephone ka auh lio can ngelcel cu sizung ah a cah ka te a rak si. A nu le a pa cu tah buu in an ka chonh tik ah kalung a hno ve. Kahawi le nih ka mithmai aa nuamhlo an hmuh tik ah an lung aa nuamh ve lo ca ah, panh te le nuamte in um kaa zuam than. A chuahka in kan um ti lo ca ah aho a mui alawh zong ka thei lo na in, nungak kum 23 te nih cu ti cancer i kan thihtak ko cu ka ti. Nunnak cu Pathian ta a si fom cu ta. A ngeitu nih a lak than.

Kum 3 ah voikhat kan tuahtawn mi Chin Forum Managment Body meeting cu ni 2 chung Tourist Lodge, Chaltlang, Aizawl ah kan thu hawi. Adonghnak Meeting kan ngeih hi Frankfurt, Germany ah 2006 kan tuah. Thilthar zeihmanh kan ceihmi a um lo. Sihmanhsehlaw, kan i timhmi area 3: Constitution (drafting si ti lo in, education), Human resource development le Information kong he pehtlai in ramchung ah kan lohma kan nawr deuh lai tiah biachahnak kan ngei. 2010 thimnak kong tu ah cun Chin National Council siseh, Ethnic Nationalities Council lamhruainak bang kan i zuam ve lai kan ti. (Statement kha nan hmuh cang lai dah!)

Nov 16. cu Chin Forum nih nikum ah Mizoram Uni. he tiah Aizawl ah kan tuah mi Chin Historical seminar chung khan the best articles 32 tluk ca uk in kan chuah mi a um i, cu cu Book release Function kha Mizoram University siseh, Euro-Burma Office lei in phaisa thazang a kan bawmtu an si ah, Chin Forum he ti in, kan tuah. Hi kan Book Release hi Mizoram kanpa bik Chief Minister Pu lal Thanhawla nih a kan telpi i ca uk awnnak zong a kan tuah piak. Nazi 1:10 chung biachimnak a ngei i, a ho hmanh theplo in a bia cu kan ngai. Paza bak a si ka ti. daihnak ka duh ca ah, kan thutdan kha MNF ka rak kianh hna cu cu Vawlei cung tuanbia ah a ho politician hmanh nih an tuah lo mi a si a ti.
Note: mah Book release Function DVD kan lak mi a um i, a zoh duh ca ah $ 20 he cah khawh a si. keimah pumpak email vblian@hotmail.com ah a duh mi nih nan kan cah khawh.

Cu zan cu British MP Lady Baroness Cox le a hawi le USA, UK in 12, USA in Refugee International 2, Chin Forum (Germany, Japan, Sweden, USA, Canada, Thailand, UK) in 8, Euro-Burma Office in kan Director Pu Harn Yawnghwe le Dr. Achan Mungleng (Delhi) cun Chin National Assembly kai ding ah a ra mi hna he tiah, Mizoram kan hawi le cheukhat hna pin ah, MP hlun Ngun Hre le kan pa Zing Ku pa tiang in an kan telpi i, zanriah kan ei dih hnu ah Mizoram kan hlasak thiam, Mimi lalzamliani (Tutan Mautam Concert USA kal ding ah a tlam a tling deuh lo. Australia le Singapore, Malaysia, Thailand ah a kan telpi mi a si), Miss Te Remi (Gospel singer minthang a si) , Miss Tini (India Idol ah aa zuam ding Mizoram chuak Nepali nu te hna nih a tui khawh chung in an kan nuamhpi i, kan lam nak ah kan thlan hripi he kan i ciah dih ko. Kan hawi le mirang pawl zong an tui tuk i, ngol an thei ti lo. Cuticun kan can cu nuamte in kan hmang. Kan pi tar Lady Cox zong cu Lai coat aa hruk i, aa thui sek ve.

Chin National Assembly cu Chin National Council nih ni 3 chung an kan peh pi than. Ramchung ramleng in minung 100 renglo an ra kho. Khuaza kan miphun ca ah kan khang. 2010 nih hin thlennak cu chuahpi lo hmanhseh law, thlennak hrampi pakhat a si kho ve ti kha ruah a si deuh. Riantuan ding lawng te khatlak in kan i khinh ko khah!

Delhi ah ENC in India cozah lei upa chonh ding le an mifim (think-tank) pawl he biaruah ding ah siseh, cun MPs pawl an si ah, Institution pawl sin ah EN kong chimh ding in Pu Lian Hmung Sakhong, Pu Sui Khar le Harn Yawnghwe le Dr. Achan Mungleng ti in, ni 5 chung Delhi ah kan rak cam pah. Retired Generals hna le Ambassadors hna le former ambassadors hna le Foreign service i atuan mi hna pin ah Embassy (US, Japan, France, Chez Republic, UK,) hna i an first secretary etc.....kan i lung si ngai ko. Kawlram thlennak ah kanmah kan khuaruah ning le kan strategy zong thlen a hau ve. US le EU le Australia, Canada, hna kha kan rak i bochan tuk hna i, kan inn pa tu kha ralzoh in kan zoh ton mi hna kha a tu cu an mah tel lo in a si kho ti lo ti kha kan i fiang cang. Hawithar kawl law hawi hlun philh hlah ti mi mission a si deuh.

Bangkok kan rak phak than tik ah cun kan tha a duai ve ko. Thlapa thlakhat chung dinhni nikhat te hmanh um lo in, kan cawlcanghnak nih zeidah a va chuahpi te lai ti cu Pathian nawl siseh. Minung lei nih kan ti khawh tawk kan ti ve, kan chim ve. India le Tuluk tello cun kan ram kong ah ramdang nih zeitluk hmanh in an cawl zong ah a har ngai. Tuluk hmanh nih Kawl cozah cung ah aw ann a ngei i, nan nih Democracy ram nih dai zuar in nan um ko! ti kha kan bialak bik cu a si.
Tawlreltu - on Monday, November 30, 2009
categories: | edit post

1 Responses to Kadiary: Mizoram kan tlawnnak

  1. suburbanian Says:
  2. ေရာက္လာတယ္.....

     

Post a Comment

Total Pageviews

Google Search

Custom Search

Unsafe State

GPS cawkding

Chin Youth Organization

Chin Youth Organization
www.cyona.info

Donate Us