by Saya Danny Bawi
Tuni Vawilei cungah hin Holh (6800) hrawng a um ti a si i cu chungah cun Holh (2212) nih hin mah Holh tein BaiBal (Bible) an ngei i an rel khawh. Cu Chung ah cun kan nih Lai /Chin Miphun zong nih mah Holh tein Bible kan ngei ve. A sinain Holh (2000) leng nih mah Holh in Bible an rel kho rih lo. A minung in cu Million (440) nak tam an si. An caah thlacamnak ngei hna usih. Bible timi biafang hi Mirang holh a si i Greek Holh "Biblos" or "Biblion" timi in a ra mi a si. A suallam cu "THE BOOK" Cauk tinak a si. AD 398-404 hrawng ah khan Bible tiah min pek a rak si. A cheu nih cun "John Christianson of Constantinople" tiah an ti.
Bible ah hin Old Testament (Cahlun) le New Testament(Cathar) tiah tthen a si i a uk in cun (66) a um.
Cahlun (OT) uk 39 le
Cahtar (NT)ah uk 27 ti in a rak um.
A Ngan (Chapters)
Bible Cahlun (OT) ah a ngan(Chapter): 929
Bible Cathar (NT) ah a ngan (Chapter): 260
A zapi te fonh ah a ngan (Chapter): 1189 aum.
A Hme (Verses)
Cahlun (OT) + Cathar (NT) : 31173 a um.
Mirang nih Old Testament le New Testament tiah Baibal hi an tthen. Testament ti a suallam cu Biakamnak tinak a si i Authorized Version ah cun Testament timi biafang hi voi (13) a hman. Khat lei kam in cun Pathian nih a Fapa Jesuh Khrih hmangin Amah le minung karlak ah Khamhnak he pehtlai in biakamnak a ser tinak a si.
Cun Mirang Baibal ah cun Scripture (or) Sriptures timi biafang zong a hman zong kha ka hmuh fawn. Hi biafang hi Latin holh in a rami a si i suallam cu "Writing (tialmi ca)" tinak a si. Hi biafang "Scripture" cu Cahlun chung Daniel 10:21 ah voi (1) le Cathar ah voi (52) kan hmuh khawh.
The Word of God (Pathian Bia) timi hi Cahlun ah cun a tu le a tu kan hmuh lengmang nain Cathar ah cun voi (40) hrawng lawng kan hmuh. A Ngan (Chapter) le A Hme (Verse) tiah an rak tthennak hi Original Translators (Amah Baibal tialning tein khan holhdang in Calettu) pawl nih rel le zoh tikah fawi deuh seh tiah saduhthahnak he an rak then mi a si.
A Ngan (Chapters) le A Hme (Verses) hna hi kum zabu (13) hrawng ah khan an rak tthen cang ko nain tuni i kan hmuh ning te bantuk hi cu a rak si lo. Kum zabu (16) ah French canamtu pa nih an mah Grik (Greek) baibal cauk cu tuni kan hmuh kan hman ning bantuk tein hin a rak chuah tiah mifim hlattu pawl nih an chim. A cheu nih A Ngan (Chapters) cu Cardinal Sancto nih A Hme (Verses) cu Robert Stevens hna nih 1560 kum ah an chuahmi "The Geneva Bible" timi ah hmuh hmasabik a si tiah an ti ve.
A tu kan hmanmi Baibal Cahlun hi uk (39) a um nain Judah mi biaknak i an hmanmi Baibal (Torah) timi ah cun uk (24) lawng a um. A ruang cu Samuel, Siangpahrang, Ezra, Nehemiah le Esther tibantuk cauk hna kha then lo in a fonh hna caah a si. Sihmanhsehlaw a tu ka mah Khrihfa nih kan hmanmi Baibal bantuk hi a si ve ko. Palhnak a um ah cun zangfahnak in keimah pumpak ka email ah theihternak ka ngei te uh law ka lawm ko lai.
Danny B Thianhlun
CCFC, Chicago
0 comments