Pu Mang
Battle Creek, Michigan khua i paam bawmhnak concert cu zarte ni ah khan lakeview high school ah 7:00 p.m in 9:00 p.m tiang tuah asi i tlamtling ten an lim. A zoh tu minung zali renglo, hngakchia le semno he u pa tar tiang in an hawng chuak i $9,000.00 dengmang hmuh chuah asi.
Khuami Tedim le u nau hna nih hla fung hnih an van sak lio ah mi pi cu khat thup in hall chung ah cun an hawng lut. Humhimnak caah palik pawl kan sawm mi hna nih a leeng he a chung he an kan um pi. Cu hnu ah local lei Tuanvo la tu Pu Cung Sang (Thlatlang khua Pu Khua Thawng mak pa) nih a herh mi zulh ding tete a van chim hnu ah Indiana lei i tlangtla tu Elaisa Vahnie nih hi concert tuahnak kawng tawmpal a van chim ta. Cu hnu ah concert taktak cu kan van thawk cawlh.
Salai Tawna an ti mi Dr. Za Tawn Eng nih siaki pakhat cu a van tum i, d:-: l,: d:-; l, aw hnih nih Hall khan pi cu a tlirh in a tlirh. Lam hla pi a hawng zuang i kan lu cung a hawng kan lonh mi van lawg aw bang tuk asi. A sam cu sui rawng a nei i hualgno puan ttial pi cu akehlei siang ah a bah i a vawrh lei khawl ah a tong. Mipi cu zei hme a tum hnga an ti i an ar ko. Mah a tum dih cun Lian Do te U nau hla kha a van sak than cun, ruah pi sur kuk kuk law ti mi nau awih hla pawl kha a van thawi thluah mah. Atum pah a sak pah lio ah alu athin pah i a suisam lem liang cen sau cu hnu lei ah atawlh i a cel lei sam pangngai cheukhat ahawng lang sual rup. Mi pi cu an ni i cu ah cun a suisam lem pi cu aphawih pah in stage hnu lei ah nih bu le kut veih bu in a lut Tawna cu diam. Salai Tawna hi ringawn khawvel ah kum 20 lenglo a cencilh cang mi kawl mi lak ah lai miphun min a rak that ter tu lai pasal tha asi. Ya khai Yu Mah tawng Tan neh, Eco Tu ti mi pawl kha a hla minthang an si. Kawlram actress Tin Tin Thun, Hlasa Aungnain te Salai Khin Maung Tanh te pawl hram awt pi tu a rak asi.
Kawlram kulh mithang Sung Tin Par cu kawrnak fingrilh le kekawr tawi el cen he a hawng tli thuah mah. Mipi cu Sung Tin Par, Sung Tin Par tiah an au thluah mah. Battle Creek musician pawl cu nikhat te lawng an cawn mi Rock & Roll hla pawl cu an van thuat hluahmah. Hla cu avan sak thluahmah i akar lak ah mipi he a hei chawnh pah. Ahla zawng mi pi a hei sak ter pa alam pah in keh lei vawr lei ah a tli. Asam sen nawn le kir nawn mi a van hei pah in Drumer hmai ah
a dir i a tawtawk cu mi pi lei hawih in keh vawrh ah a van thui thluah mah. Cu cang ah cun amawng nawn mi lai tlang val hna cu stage hmai ah a hawng tli i pangpar bor tha tha a hei chanh. Sung Sung pangpar akeng cawk ti lo i ttuang ah avan chiah. Adang hla pa khat cu avan nawl than. "Lai mi ka si ka uang tuk nan i uang cuai maw" avan ti hna. Hla panga a sak hnu ah a hnu lei ah a kir i Hniang Hniang nih a van chawn."Nan dam maw kan ngai tuk hna" tiin hniang hniang nih a vawn awt. "Kan dam ko nan nangmah zuun in kan zaw e" tiah tang in avan au ve. Ahla duhdim tete a van sak thliah mah cun ah cun mipi a phursup mi cu ahawng dai rup. Dr. Ral Khar cu ahmai cem ah athu i alunghmui tuk ah mirhzuam pi an nu cu a hei zoh pah. Tlangval hna nih cun pangpar cu khat thup in a pek hoi i a kut khat nih a zo ti lo. Mipi lei in "na dawh tuk" avan ti i Hniang Hniang nih cun "hika lei style i hurk eih hi ka sia a rem set lo e" a hei ti pah. Saphaw kedan a bumh mi cu a khup tiang aphan i a angki phur he a tong lul lak. A el zim lei zabok kauh hrawng a lang. A tungtai a rem, a aw a thlum, a mui iang hlei cuai asi fawn, hmurka a thiam ttung i uar lo awk le thih pi lo awk a tha lo hrim cu ta. Cun hnu ah Solomon nih a van chawn.
Slomon cu Rock hlasa a asi. Falam mirum arak si mi Pu Ral Sailo tu pa a si. Anu tta a pu cu U Buta, Vawi Mawi lead guitarist, kha asi. Amit kuak velchum cu meicup purple rawng in a kulh. A hmur zawng cu rawng cu chak pin a thuh. A sam a kir i a hgawng tiang a phan. Leither angki nak le Jean kekawr tluan tet nawn in a van i hurh. A kedan he a milh tak. A hla music a van thawk hlan in nungak te te nih pangpar a van pek thuah mah. A Rock music a van thuat hluah mah i Solomon cu a van lam colh a lu chuk cho ah a van thin, a kut van ah a van zo, a hla beat ning in a kut cu a a thui. A cheu khat pangpar cu a kut a van vuak deuh ah a chwi viar. Hal pakhat asak lio ah cun ttuang ah bawk vaak in a vaak i a raaak pah a au pah. Mi pi nih zei dah cang hnga an ti an lau pah. Meicer kap tu nih Spot light in a kawl i a ceuh len nan a bawh caah a nganh. Tawmpal ah stage cung monitor song box phen te ah a van kawl khawh than. Solomoncu lai mi rock hlasa thiam pakhatnak ah rock a uar mi nih cun an chiah mi asi.
Musician pawl cu tlawmpal lawng practice caan an nei nan ruahnak nak in an thiam tiah Singer pawl nih an ti. Sound system zawng a lung asi tuk sound Engineer pa kha rak kan bawm rih law kan duh ko an ti. Mai Sung Tin Par nih"Laimi phun dih lak hiban tuk in nan ttuan tti khawh caah kan ilawm tuk" tin puai a dih hnu ton nak ah a chim. Hniang Hniang nih "Ka ruah bel lo mi mah ban tuk in lai mi caah ka pumpek khawh mi hi ka lawm tuk" ati. Solomon nih "Kan nih cu music ralkap kan si " tin bia kan i ruah ah a ti. Pu Elaisa cu Indiana ah kir a tim i Sung Tin nih "Elaisa Tap hlah tap hlah a ti i "a hei pom ta hnu ah Elaisa cu hiing nawn ten muilak ah a kal i a lo riah mah.
0 comments