CNF le Chin Miphun Dothlennak
By Salai Lairamthang
88 Sianghleirun Dothlennak nih CNF hi a hrinmi a si. Ne Win cozah nih cabuai cungah ram buainak ser loin hriamnam in daihnak ser a timh. Meithal in mipi a kah hna, a thah hna. Thisen tampi a rak luang, Kawlram um, miphun vialte, lungfah, thinhun, thinphan le thlalau ceih lo ruangah CNF nih zaukphung ngah khawhnak dingah siseh,, mah ram teah mah tein uk khawhnak dingah siseh, mah le mah I vennak caah siseh, hriamnam tlaih hi an rak I thimmi a si. Ralkap cozah cu hriamnam in kan tuk lai i, kan tei lai ti si lo in kan ram le kan miphun vennak caah hriamnam an rak tlaihmi a si. Mah pin lei ah CNF nih an i ruahchanmi thil pakhat hmanh a um lo. Chinland ram uk duh ruangah a si lo, zaukphung le mah te uknak phung ngah khawh tiang lawng khi an I tinhmi a si. An I timhmi pahnih te kha an ngah khawh ahcun CNF hi um zong a herh ti lomi a si. Mah cu mipi nih kan theihthiam ding hna a si.
CNF nih Chin miphun caah anmah le an si khawh tawk in an I zuam ve ko nain, Chin miphun cu nan theih cio bantuk in kan fing le kan tlang, kan holh le kan nunning tete a dangmi nih I hmuh thiam lonak a um caah kan lungthin a rak kan thencheu ngai. Chin miphun zapite lungrualnak hmuh khawh cu a rak fawi lomi a si. Asinain CNF nih lungsau ngai in Chin miphun lungrualnak hi a zuam zungzal mi a si.
CNF nih Canada ram Ottawa khua ah 1998 kum ah khan Chin Seminar tuah ding in a rak tawlrel i, Chin forum zong rak dirh a si. Mah ahcun pumpak cio in rak sawm a si. Bu le Party in sawm an rak si lo. Mi hmuh ning ah a dawh lo sual lai tiah. Working groups phun 6 tiang rak ser a si. Working group 1nak nih ram uknak phunghram suainak kong tawlrel a si i, Pu Lian Uk le Dr. Vumson cu rian pek an rak si. Mah an riantuanmi thawng in Kachin, Karen, Mon le Rakhine te hna zong nih rak I cawn cio a si. Karen, le Kachin nih kum 40 renglo dohthlennak an tuah nain mah bantuk ramuknak phunghram hi an rak tuah lo. CNF nih dothlenak kum 20 a tuah hlan ah mah vialte a lim dih. Hmailei ah Ralkap cozah le tlang chungmi tonnak a um ahcun Chin miphun cu uknak phunghram kuttliah ready tein kan ngei cang. Mah vialte cu CNF riantuannak thawng in a si.
Chin Forum cu, CNF nih duh poah in tuahmi a ttengnge pakhat sawsawh a si tiah CNF cu a phunphun in dohdalnak rak tuah than a si. Cucaah CNF nih pumpak si loin a bu in riantuanti nak zong ngeih ding in rak tawlrel than a si.
Kum 2000 lio ah khan CNF Camp ah Seminar rak tuah than a si. Political Affairs Committee of Chinland (PACC) timi dirh a rak si. Mah ahcun Zomi National Congress, Chin National League for Democracy, Mara Peoples Party, Chin National Front le Civic Organization 20 reng lo nih Victoria Declaration an chuah. 21st Century ah Chin Miphun Lungrualnak Lung rak bunh a si. Cu hnu ah Camp Mt. Sainai ah First Chin National Conference tuah a si than i, Chin National Council timi ser than a si. Nihin ah cun, Chin Political Party pa 4 le Civic Organizations 20 reng lo cu, Chin National Council timi tang ah lungrual te in rian an tuan ti. Hi bantuk thil tha achuah khawhnak caah, lam a vat hmasatu hmawng a thiam hmasatu cu CNF thiam thiam an si ko. Mah kong hi Dr.Salai Ngun Cung Lian zong nih voi tamtuk a rak chim cangmi a si.
Victorian Declaration cu, CNF Headquarters in an chuah timi cu ralkap cozah nih fiang tein an theih. Cucaah Chin Miphun lungrualnak an ngei lai ti a phan tuk caah, India cozah sin ah CNF Camp Victorian na kah lo ah cun India ram i dohthlenhnak atuah mi pawl kan bawmh ve lai a ti. Cucaah Camp Victoria cu CNF nih rak chuah tak asi. CNF nih Chin Miphun lungrualnak aduh tuk i, a tuan tuk caah, Camp Victorian tiang an sunghnak a si. Cucaah CNF cu Chin mphun lungrualnak a hrawktu a si kan ti lengmang mi hi a palh cikcekmi a si.
Cucaah Chin miphun lungrualnak taktak kan duh ahcun CNF lawng si loin phu dang le bu dangdang zong in Chin miphun caah riantuan khawh a si. Pumpak zong in tuan khawh a si. CNLD, Zomi Congress Party, Mara Party, Chin National Council, ENC tibantuk zong in tuan khawh a si. Asiloah Bu dangdang zong dirh khaw a si. Asinain mah bantuk zong tuah taktak kan I tim fawn lo. CNF nih palhnak pakhat khat a tuah tikah zapi theih in tlangau cu kan thawng ngaingai. CNF nih harnak a ton tikah zeihmanh kan theih piak hna lo. CNF nih mu le mal, phung le phai he tha tein a hruaimi bu a si. Palhnak an tuahmi ah anmah tein dantatnak an ngei ve. Mah zong cu mipi nih kan teihpiak hna a herhmi a si.
Ka lawng in ram dawt cu a fawi te. Asinain tuahsernak in ram dawt hi a har deuhmi a si.
Chin Miphun caah nunnak a petu hna upatnak caah mah
cabia te hi tialmi a si.
Upatnak he,
Salai Lairamthang
Washington D.C
a tha tuk mi ca nan kan ttialpiak caah na cungah lunglawmhnak tam pi ka ngei. Van kan peh piak peng.
Hi ban tuk ca hi tam deuh in tial kan hau .. Well done
hi bantuk in ram le miphun dawt nak he fak piin rian nan tuan hna i nan fimnak le nan thiam nak hna hmang in rian nan tuan nak le nihin lai mi sin i nan duh nak nan langh ter mi ruang ah kan i lawm ngai hi bantuk thi le ruah nak hi lai mi a bik in mino hna nih kan gnaih khawh ve nak hnga rak tial lengmang harm ko u